شفتْ راسي في المرايا
ؤ ما عرفتوش
سوَّلْني بلْسانْ الدَّهْشة
شْكونْ انْتَ يا؟
حشَمْتْ منِّي
غرْغرُو عَيْنَيا
ؤ ما جاوْبْتوشْ
خَنَزر فيا بعْيونْ الشْفايا
قال لي شْكونْ تْكونْ
غيرْ شويتْ الهَمْ زايْدْ
ؤ مغشوشْ.
طْلعْتِ في الراسْ
الزمانْ فاتكْ
بهاتو زغباتك
و رْمادْ الْحَلْمَة
في عيْنيكْ مَرشوشْ.
* * * ؛ * * *
شفت راسي في المرايا
حالْتو تْشَفِّي
ما فيهْ عْنايا
فقتْ منُّو
ضْحكتْ منِّي
ؤُ ضْحكْتْ عْليهْ
نْفضْتُو منّي
مْسحتْ صورتو بكفِّي
ؤُ خرجتْ لَخْلايا
حْضَنِّي سلْهام الليلْ
ؤُ عنْكًَتْني نْجومُو
بسْبايْلْها مسْحَتْ بْكايا
_____؛_____
لمجيد تومرت
13 مارس 2019
لست ربوت